Lai mat wa sai shaning (10) jan ning daram hta internet kaw anhte jinghpaw wunpawng myusha ni hte seng ai hpe naw n lu tam mada ai. Ga shadawn Youtube hte Google ni hta kachin, wunpawng shing nrai jinghpaw ngu ka bang dat yang mahtai n lu Myusha shiga, yungui hte sumla hkrung zawn re ni hpe mung sawk tam lu na grai yak lai wa sai. Internet hpe hpaw dat yang tinang a computer screen hta laika she chyat hkra ka da ai hpe mu mada tim myusha ni a laika gaw mu hti na matu grai yak ai.
Raitim ya dai ni na ten hta myusha website hte blog ni hpe internet hta law law wa mai tam la let tinang ra sharawng ai lam ni hpe mung mai sawk sagawn la mai sai hpe mu mada dat ai shaloi gaw ngai wunpawng myusha a myit kraw kata hta n dang tsun hkra kabu awlaw dik lu sai re. Gashadawn Youtube hta kachin ngu ka bang dat yang wunpawng myusha hte seng ai lam yan ni hpe yu n ma hti n ma madang dep wa saga ai re.
N dai lam ni hta hpu nau ni n kawm myi maigan laika hte sha tsepkawp ka mat wa ai hpe bai mu hkrup yang myit hta n dang tsun hkra machyi hkam sha ai. Jinghpaw wunpawng annau ni gaw laika lu la ai shaning (100) ning jan sha naw re majaw anhte a laili laika kri rawng ru jung hkra naw jawm shakut sa wa ga ngu let sha hpung dim dat ga ai.
Laika mat mat jang amyu mung mat na. Amyu mat jang mungdan mung mat na.
