Ten ladaw ni lani hte lani she lai htum mat wa tim, Annu wa ni a rawt malan hkrun lam wa, ngai wunpawng brang a kraw salum kata hta gaw mani mana zawn sha gatsing hprap hprap hkam sha shingran nga n ngai. Sinat n sen ngoi jang majan byin sai, myutsaw share shagan ni awng padang dip awm dawm shanglawt lu na matu majen je gasat shamyit shakut nga ai n sen mung rai nga ai.Chying hkai Nu hte Ngai mung hkau hkye n gu dang hpra gun rai rawt sai. Lahpa de magyi magaw re hte shagan wa myi n kap tim myu hte mungdan a matu salat hte grit a nut shakut nga ai Hpu ba hte Kanau mung shawng lam majan rawt sai. Mare sin hpyenla rai nga ai chyinghkai Wa mung wunkat la na matu Warabum de sui. Shata myi daram gaw na na re nga Nu hpe htet da ai mung she na.
Ma sai sawa myen hpyenla ni a majaw ma sai, Annu n ta de bai du wa ai shaloi mare ting ma sai.Ga tsun ga la rai sha galaw tawn ai n ta mung hkru sai.Wala ginhtawng n tai u ga she bau da ai Wa mung ma sai. U yi U la yawng ma sai. Goi e myen sawa hpyenla ni mare de lai du shagu prat hpe n nan (0) kaw na bai hpang la ra ai annu wa ni a prat prat wa.
Nam maling kata na namlaw namlap hpe sha di marut la rai wa shat di kaw shadu da ai malu masha hpe sha annu ni jawm sha let pu matut dat saga ai. Kaji htum kanau Htoi Seng Pan mung nu a lahpyen kaw dung let n dai n kam sha ai, Jum n ngam ai,shat she sha na nga hkrap a wut nga ai kanau Numsha a myiprwi wa mali hka nu zawn she lwi nga sai.
Rai tim; n ngut shi ai rawt malan hkrun lam na annu wa ni a hkrun lam hpe matut majen je nga let sha.....
