KIO/KIA a shawng lam hte seng ai ndau shabra laika.Ndau Shana dat ai lam
Nhtoi;- 14/5/2009
WP- Amyu Sha ni yawng hpang de shana dat ga ai.
1. KIO Ginjaw Komiti Hkumra Zuphpawng hpe 2009 ning May shata 11-12 ya laman galaw ngut sai.
2. Ndai zuphpawng hta Wunpawng Amyu hte Wunpawng Mungdan Sha ni hkrum hkra nga ai mung masa mabyin lam ni hpe maram yu nna shawng lam hta ta tut galaw sa wa na magam bungli ni hpe masing jahkrat bawng ban ai rai nga ai.
3. Ginjaw Komiti a daw dan tawn ai lam ni gaw lawu de na hte maren rai nga ai.
(a) KIA hpe hkrang galai hpaw shabawn na matu SPDC Asuya a hpyi shawn ai lam ni gaw, tinang KIO hku nna sung sung li li myit yu ra ai lam re ngu hkam la ai. Asuya hte hkut hkut nai nai bawng ban jahkrup hkat lu ai hpang she daw dan sa wa na matu myit hkrum daw dan ai.
(b) Munghpawm Myanmar Mungdan Asuya seng ang ai ni hte KIO a lapran e hkrum shaga bawngban lam bungli ra sai re ai majaw KIO Ginjaw Komiti gaw Dat Kasa Hpung langai mi laksan hpaw shabawn na matu myit hkrum daw dan ai.
(c) Munghpawm Myanmar Mungdan Asuya seng ang ai ni hte KIO a lapran hkrum shaga bawng ban sa wa ra ai lam gaw, KIO Wuhpung Wuhpawng hte sha seng ai lam n rai nga ai, Wunpawng amyu hte Wunpawng Mungdan sha shawa daw tsa nlang hte seng nga ai re majaw, lapran tsap shaga lawm ra wa ai lam hta garum na matu Simsa Lam Tam Salang Hpung hpe mung garum hpyi shatsam lit jaw sa wa na matu myit hkrum daw dan ai.
(d) SPDC Asuya maga kaw nna KIO Ginjaw hpe tsun tawn ai lam tsun dan ai hte laika jaw tawn ai lam hpe tsun shaleng sang lang dan nna, KIO Ginjaw Salang ni hte lit nga ai ningbaw ningla myit su du salang yawng, Magam gun masha, magam dap kata hte kanu kawa mungchying shawa yawng hte mungkan mungdan shara shagu chyam bra nga ai. Wunpawng Sha ni yawng kaw na hpaji hpyi shinggyin la na hte ahkyak ai hpaji jaw lam ni hpe Ginjaw Komiti de laika hte tang shana jaw shangun na matu myit hkrum daw dan ai.
4. 2010 Ra lata poi byin pru wa nna Asuya nnan byin pru wa ai rai yang Hpyen Asuya hku nna Asuya ningnan hpang de Ahkang aya ap ya ra ai re majaw laknak lang tawn ai KIA hpe hkrang galai hpaw shabawn sa wa ra ai lam shana wa ai lam nga ai.
5. Mung shawa ni yawng jawm gaw gap da ai KIA a lam hte seng nna ningmu ni hpe uhpung uhpawng hku nna mung, marai langai hkrai hku nna mung lawu de na hkringdat de madi nna hpaji jaw la na matu saw shaga dat ai.
De:-
Zai Ninggawn Rung
Wunpawng Mungdan Shanglawt Kongsi
Laiza Alen Bum
E-mail Address:- zngkachin@gmail.com
Hkungga let,
Matsun Du
Zai Ninggawn Rung
