Wp myusha ni law malawng gaw daini sha na matu daini tam la na pyi grai hkak let asak pu kam matut nga ai hta Ma ni a jawng lung jarit mung shawoi shaning na hte n bung ai sha jawng lung jarit grau grau law wa sai hpe mung matut na chye lu ga ai. N kau myi a kashu kasha ni gaw jawng lung na manu jahpu nau law (nau hpu) wa ai a majaw jawng n lu lung ai sha matsan mayan rai sha sak hkrung nga ai lam hpe mung buga masha ni kawn na chye lu ga ai.
Maga myi de mung ngun naw rawng ai ramma ni nkau mung kani nang hpam tsimawan hpe chyu baw bang lu sha nga ma ai majaw mungkan a hkrit tsang hpa ana zingli ni mung lani hte lani grau grau law jat wa nga ai majaw N kau kanu kawa ni gaw tinang a kashu kasha ni hpe bungli dabang ni de dat na pyi myit n hkawn hkrit tsang nga ma lam hpe mung lahta na buga masha ni kawn sha na chye lu ga ai.
Ya na zawn grau grau na wunpawng mungdan kata hta yak hkak wa ai lam gaw Myen hte shanglawt gap hkat jahkring kau ai hpang kawn, Myen hpyen asuya gaw tinang jinghpaw mung kata hta galaw lu galaw sha lam, dut lu dut sha lam ni hta adip arip rai shagyip shagyeng ya nga ai a majaw re lam hpe mung matut tsun dan wa ai. Myen hpyen la ni gaw jinghpaw wunpawng myusha ni hpe "nan hte jinghpaw amyusha ni hpe nam de gawt kau na " ngu du hkra shagyip shagyeng nga ma ai lam hpe mung na chye lu ga ai.
