Daini August shata praw 27 ya shana de daw hkying 5:30 daram kawn Peng Jiasheng woi awn ai Ko Kang hpyen hpung ni hte Myen Gumshen hpu ni gap hkat hpang sai lam shiga na lu ai. Hpyen hpung Lahkawng maga hta hkala n'ba hkrum ai lam hpe gaw a tsawm sha n chye lu shi ga ai.Shawng n'nan ya na zawn laja lana majan gasat wa na matu manghkang kaba byin hpang ai gaw Ko Kang ni a ginjaw "Laogai" kaw na re lam shiga dap ni kawn sagawn chye lu ai. Grau na gaw Ko Kang hpe Myen gumshen asuya a "Ga Jarit Sin" hpyen hpung, hpyen hkrang lawan galai na matu atik anang tsun shadut ai hte myen hpyen hpung ni Ko Kang shara de du bang wa ai a majaw ya na zawn majan byin hpang wa ai re lam na chye lu ga ai.
Lai wa sai laman hta sha "KIO/A , SSA , KOKANG , WA hte Maingla hpyen hpung; N dai Uhpung 5 gaw lama na Myen gumshen hpung ni Uhpung langai hpe gasat hpang wa yang yawng jawm gasat na matu jawm myit hkrum da ai lam mung nga ai re.
Ya ten Ko Kang hte myen ni shawng gap hkat hpang sai a majaw Jinghpaw Wunpawng myusha ni mung lam shagu hta sadi maja let hkawmsa nga ma ai hte Jinghpaw Wunpawng Mungdan kata hta mung lam amyu myu hku n'na shiga grai gahtet nga ai lam Myitkyina shiga lawk kawn sagawn chye lu ai.
