Kokang hte Myen gumshen majan gaw ngut mat sai, shawoi na zawn sha simsa sai nga na myen asuya gaw shanhte a shiga dap ni kawn tsun nga sai re. Majan byin ai shaloi majan yan,majan hprawng rai nga ai Miwa mung du kokang mungchying sha ni hte laga mung masha yawng hpe tinang a shara, buga de lawan bai wa na matu Miwa gaw shadut nga ai re.Raitim Kokang mungchying sha ni gaw tinang buga de bai n htang wa na matu rai n'gui,naw hkrit shajang nga ma ai lam na chye lu ga ai. Buga de du wa ai shaloi lai sai ten na zawn majan bai byin wa na hpe myit tsang nga ma ai hte madung gaw myen asuya a ga hpe kam n mai ai a majaw kokang tsinyam masha law malawng gaw Miwa mung kata kaw naw matut shanu nga ma ai lam shiga na lu ai.
N kau myi chyawm gaw hpa myi byin yang byin nga myidi chyip rai buga de bai n'htang wa sai ni mung nga magang wa sai re. Buga de bai n htang du wa sai kokang mungchying sha ni yawng gaw 3,000 hte 4,000 daram gaw rai nga sai hpe mung matut na chye lu ga ai. Daini na myen asuya a shiga ni hta gaw 5,000 jan dum n'ta de bai du wa sai lam tsun madun lai wa sai re.
Hpa myi nga tim kokang hte myen gumshen asuya a masum ya majan a majaw Miwa mung de hprawng shang wa ai tsinyam masha jahpan gaw 40,000 daram rai nga ai lam UNHCR shiga lawk kawn na chye lu ga ai.
