Laja yang shanglawt Gik "Checkpoint" kaw magam gun nga ai shanglawt hyenla lahkawng si hkrum n'na langai gaw lagaw kaw hkala hkrum ai lam na chye lu ga ai. Ya na zawn rai shanglawt hpyenla ni si hkrum ai lam gaw, sinat ni hpe gashin gatsut lajang nga ai shaloi sinat dumhpran mat wa ai majaw si hkrum ai re lam mabyin hpe myi chyaw mu ai ni kawn na chye lu ga ai.Mabyin gaw ; Laja yang shanglawt Gik "Checkpoint" kaw dung nga ai myutsaw brang langai gaw shi a sinat hpe jep gashin gatsut shagreng nga ai shaloi n'dum shamyi shi a sinat dumhpran mat wa ai a majaw shi a makau na manang wa hpe gap hkra sat kau hkrup ai hte ganing n'chye di maroi n'ni ai majaw shi hkum shi bai sinat hte gap sat si sai lam na chye lu ai. Dai zawn rai shi hkum shi gap sat si hkam la ai shaloi, shi a hkum na sinat machyu bai hkren pru wa ai gaw makau na laga manang langai wa a lagaw kaw bai hkala la hkrum ai re lam matut na chye lu ga ai.
Ya si hkrum mat wa sai lahkawng yan hta na langai myi wa gaw "Ma" mali a Kawa re lam na chye lu ai. Shan lahkawng a hkum tsawp moi mang hpe gaw daini makoi mayang kau sai lam matut na chye lu ga ai.
Ya ten hta Jinghpaw Wunpawng Mungdan kata de myen gumshen hpyen ni lani hte lani grau grau na hpyen n'gun jat bang wa ai hte lam shagu hta shagyip shagyeng majan baw na zawn rai ma ja e shang galaw nga ai a majaw, tinang shanglawt hpyen hpung ni mung sadi maja let nga nga ma ai hte, hpyenla ni hkum shagu mung shanhte a sinat ni hpe jep lajang shagreng nga ai ten rai nga ai re.
