Lai wa sai November shata praw 7 ya shani e galaw lai sai myen mung a ra lata poi hta "The National Democratic Force (NDF)" parti hku n'na shang shingjawng lai wa sai salang jan Bawk Ja gaw Mani Nov 23, 2010 ya shani Aung San Kaw hte sa du hkrum shaga lai wa sai lam na chye lu ai.Salang Jan Bawk Ja (NDF) ya na zawn myen mung a democracy ningbaw rai nga ai Aung San Kaw hte sa du hkrum shaga ai lam gaw, Yi sun hkauna galaw lu galaw sha nga ai Jinghpaw Wunpawng Myusha ni a mayak mahkak hte hkrat sum lam ni hpe hparan ya na matu lai wa sai shata man masum kawn ( ILO hte NLD ) de tang shawn da sai lam hte seng n'na matut ahkyak la let shakut ya na matu sa du hkrum shaga ai lam rai nga ai re.
Myen mung hta byin lai sai "Nagis" laru hte Giri laru ni hta jam jau hkrum nga ai mungchying sha ni yawng hpe gaw jut shara shagu de na ni garum lai wa sai rai tim, "YUZANA" Gungmani U Hte Win a laru hta ya jang hkyak hkyak jam jau hkrum nga ai Jinghpaw Wunpawng Myusha ni hpe gaw garum la ai lam rai n'nga shi ai lam hpe Salang Jan Bawk Ja kawn Aung San Kaw hpe tang shang hkrum shaga lai wa sai re. Aung San Kaw chyawm gaw shanghte NLD ni hku na dangdi dangdep ai daram myit ya na, galaw ya na ngu ai hpe sha bai htang dat sai lam matut na chye lu ga ai.
Ya ten Hugawng pa hta e "YUZANA" Gungmani U Hte Win a majaw Jinghpaw Wunpawng myusha ni gaw lu na sha na n'nga, nam na nai hkadung ni hpe sha htu sha let sak hkrung nga ma ai lam hpe mung Salang Jan Bawk Ja matut tsun lai wa sai re.
Jinghpaw Mung Hugawng pa hta U Hte Win woi awn ai "YUZANA" Gungmani a majaw Jinghpaw Wunpawng Myusha ni yi sun hkauna shamat, lu na sha na n'nga garen gari hkrum nga ai gaw a'ten na na rai nga sai re. Dai hta sha n'ga WP shayi sha ni law law mung hkumshan roi rip ai lam law law hkrum sha nga ma ai lam na chye lu ga ai.
