Wunpawng Mungdan Shanglawt Hpyen Dap, Ninggawn Daju, Hpung Mai Gawknu hta dai hpawt 10 Am. Aten e Mung Shawa Hpyen Hpung hte seng ai Sanglang Zuphpawng hpe galaw ai lam chye lu ai.Zuphpawng hta Wunpawng Mungdan Shanglawt Hpung (K.I.O) Dap Awn Daju, Du Daju Jum Gunhtang Gam Shawng kawn Mung Shawa Hpyen Hpung hte seng ai lam sanglang dan nna Wunpawng Mungdan Shanglawt Asuya, Mungchying Uphkang Dap Lithkam Salang Kaba Lajawng Hkawng Lum kawn hpaji jaw mungga shatsam mat wa ai. Dai hta, K.I.O a rawt malan majan gaw Mung Masa majan hte laknak majan re ai lam, Mung Shawa rawt malan majan re majaw yawng shanglawm ra ai lam, lai wa sai shaning kaw nna Mung Shawa Hpyen Hpung hpe hpaw tawn sai lam, ndai mung shawa hpyen hpung hta asak aprat ram ai ni, magam gun pru hkringsa sai hkamja lam naw nga ai ni, Civil Servicemen ni lawm ai lam, ra wa ai hta hkan nna aten hpring Army hte maren bungli hta shang tsap wa ra na re majaw Mung Shawa Dap Shawa ni yawng chye na hkra tsun sanglang dan mat wa ai.
Matut nna mung 1:00 Pm. aten hta Laiza Muklum, Myu Lawt Wunli Gawknu e mare buga na myit su kanu kawa, ramma shayi shadang ni shanglawm ai Mung Shawa Hpyen Hpung hte seng ai sanglang zuphpawng hpe galaw wa sai re.
Ya ten K.I.O gaw Mung Shawa Hpyen Hpung hpe Ginjaw Ginra, Sinpraw Ginwang Ginjaw, Dingdung Ginwang Ginjaw shara ni hta hkrang shapraw da lu sai rai nna kaga ginra ni hta gaw tsun na daram rai nre shi ai lam chye lu ai.
