Jinghpaw Wunpawng Shanglawt hpyen hpung hte Myen hpyen hpung ni gaw daini February shata praw 7 ya jahpawt daw kawn gap hkat hpang wa sai re, shada da gap hkat ai lam hkring mat ai lam n'nga ai sha matut manoi nau gap hkat nga ma ai hta myen maga de na "tat yin mu" langai hte hpyen ma ni "7" , yawng numroi matsat hkala hkrum sai lam shiga na lu ai.Ya majan byin nga ai shara gaw Manmaw mare a sinpraw dingda maga, Namhkam mare a sinna maga de ang nga ai re. Majan gasat nga ma ai hpyen hpung ni gaw shanglawt maga de na dapba (3), dung (27) ni hte myen maga de na gaw (hka.ma.ya - 15) re lam na chye lu ga ai.
Myen hpyen hpung ni gaw dapba (3), dung (27) maga de ya na zawn shang gasat maw langyet mayu ai a majaw, mani February praw 6 ya shani hta dapba (3), dung (27) shanglawt uphkang ginra de KANI shangtam na ngu shana masu dat sai re.
Shanglawt dapba (3), dung (27) ni maga de na bai htang shana dat ai hta "rai hkum shang shi mu" ginjaw kaw na ahkang naw a la ra ai ngu htang dat sai raitim, myen hpyen hpung ni gaw ya na zawn ma ja e ganaw shang wa ai a majaw shanglawt ni hpang maga de na sinat hte gap gap gahkrit ai hpe myen ni gaw kaja wa shading gap hpang wa ai majaw, simsa lam la da ai Myen hte shanglawt a lapran hta Numbat langai lang ngu na majan hpe byin hpang wa ai lam na chye lu ga ai.
Majan byin ai lam hpe asuya lahkawng maga de na ni tara shang tsun n'daw dat ai lam gaw rai n'mu lu shi ai re.
