BUMSUMSHI SHIGA
Jawngnum sha, Hkawn Din hpe sat ai lam Myen hpyenla ni hkam la
August 17, 2008
2008 ning August shata (16) ya shana hkying (8:00 pm) aten ram hta, Momawk Ninghtawn, Ninghtawn Rung e, Nhkum Hkawn Din sat hkrum ai amu hte seng nna, Ninghtawn tara agyi wa nan, balik du ni, myen asuya ninghtawn salang ni, Shanglawt de na salang ni hte Nam Sai mare salang ni a man e, masha lata shaw shangun ma ai lam buga masha ni kawn chye lu ai. " Nmawk balik rung na ni jahpawt hkying (9:00) aten ram hta du lung wa nna, mare na sakse ni hpe wa shaga ma ai; shada la hkat, tara agyi hpe la rai shana she shada jep san, masha lata shaw ai lam lu galaw ai.
Masha lata ai shaloi, hpyenla marai (9) hpe hpun palawng galai, shara galai di nna dinggreng tsap da nhtawm sakse yan hpe lata shaw shangun yang, (3)lang tup lata tim, Soe Tu Win ngu ai wa hpe chyu lu lata shaw da ai " nga nna dai kaw lawm ai salang langai kaw na tsun dan wa ai. Matut nna shi tsun ai hta, " mana ( 15.8.2008 ya shana) tup, jahpawt hkying (3:00) aten du hkra ahkyuk kata e balik ni kawn san jep yang mung, dai Soe Tu Win ngu ai wa shi nan hkam la ai nga na chye lu ai " ngu tsun dan ai kawn chye lu ai. Ndai amu hta hpyenla ni marai – 3, (sh) marai – 2 lawm ai rai tim, ya gaw marai langai sha mara hkam la ai lam hpe buga masha ni myit n dik nga ai lam hte 17.8.2008 ya jahpawt na lu ai gaw "Hkawn Din hpe sat ai, hpyenla ni rai sai, dai majaw nta masha ni myit mu myit dik hkra lajang sa wa na ga ai" ngu Nmawk na Dap Dung (437) ni masha dat nna sa tsun ai lam buga masha ni kawn chye lu ai.
2008 ning August shata, (17) ya, Laban jahpawt daw e, Momik Hpyen Zai Ladat Matsun Du, Du Up Jum, Col. Htin Maung Maw ( Momik Byuha Mu ), Dap Dung – 437 na Hpang lam lithkam hte Dap Reng, Maj. Min Tu, Manmaw Ginwang Balik Du ( Ye Min Gyi ) ni lawm ai asuya masha kaba ni gaw sat hkrum ai Hkawn Din a kanu yan kawa kaw sa du nna, myen gumhpraw lap – sen manga ( 500,000/- ) sa jaw let, shanhte a hpyenla ni a majaw byin lai sai hpe sa tawngban ai lam buga masha ni kaw nna chye lu ai. Nta masha ni a matu ra ai jum, n-gu hte jawng lung ai ma ni naw nga ai rai yang, ma ni a jawng jarik ni hpe mung hpyen dap kawn lit la mat wa na re lam, bai nna masha sat ai hpyenla hpe mung tara nga ai hte maren matut ahkyak la, jeyang mat wa na lam sa tsun n-gun jaw da ai lam mare masha ni kawn chye lu ai.
N dai shiga gaw http://www.bumsumshi.com kaw na hpe sha bai bang da ai re.
