Moi chya loi n hkoi prat kawn wunpawng myu sha ni myit hkrum mang rum, ga tsun ga la rai tsa-ban law law wa ngui pyaw simsa let nga pra hkrat wa ai ten hta annau ni a wunpawng buga wa...Nam maling kata ni hta Uri Ugan nam nga dusat du myeng ni hte hkum zup let bum marawn shagu de mada dat shagu tsit lali tsawm ai n sam ni a lapran hta magup saiwan ni ga-up let yu chyai n law ai annau ni a dai daw, mungkan salum wunpawng ga.
Ja hpawt manap kawn magum jan shang ten du hkra ngoi kachyi nga ai u numji munjoi ni a n sen wa, pu ba hkoi let ngui pyaw simsa ai myit n nan hpe shalat ya lu ai tsit tsawm wunpawng buga.
Lahkrang hkrang let gabung dum ai n sen she n na mat tim, Manau chying bau n sen, htawngka bau ngawng n sen gaw tut nawng e ngoi gadu let ngui pyaw nga ai wunpawng ga.
Marip wa Kum ja, Lahtaw wa Naw lawn, Lahpai wa La ring, N hkum wa Tu hkum,Tang wa maran Tang shan,Yaw hkum, Yaw len, Hka shu, Hka sha nga wunpawng annau ni a pyaw len ginra wunpawng ga.
Ju manau, sut manau, badang bungran manau ni hpe rau sha myit hkrum mang rum let jawm nau wa sai annau ni a wunpawng ga.
Ya daini na ten hta wunpawng mungdan kata hta hpa byin nga a ta...? ngu let sha hpung dim dat ga ai.
