Germany mungdan kata hta hpaw da ai hpaji jawng langai myi hta a kajawng sha sinat hte shang gap ai a majaw jawng sara 3 hte jawngma 10 gapsat hkrum sai lam na chye lu ga ai.N dai sinat lang ai wa gaw dai jawng kaw masha 10 hpe gapsat ngut ai hpang balik ni a rim zing na kawn lawt lu na matu mare kaba kaang de hprawng shang wa ai lam hta mu hkrup ai masha lahkawng hpe mung matut n na gapsat ai hta mung masha 2 bai matut si hkrum sai rai nga ai.
Shi lang ai sinat gaw kawa mari da ai sinat rai na re ngu sha seng ang ai balik dap ni kawn maram da lu ai lam hpe mung matut chye lu ai. Sinat hte jawngma , jawng sara ni hpe gap sat ngut ai hpang rai tim matut n na sinat lang let mu mamu masha yawng hpe hkan gap sat nga ai a majaw seng ang ai balik ni kawn n dai sinat lang ai wa hpe gapsat rim la lu sai lam hpe mung matut chye lu ai. Hpa majaw ya na zawn n dai 17 ning re ma gaw tinang lung lai wa sai lahta tsang jawng hta sinat hte shang gap ai lam hpe gaw ya du hkra a tsawm sha n chye lu shi ai hpe mung seng ang ai shiga dap ni kawn na chye lu ga ai.
