Dai hpawt July 22 ya hta Myitkyina kaw jan chyat ai hpang, Du kahtawng lawk, Ya Ya Ka rung kata de Chyahkyi langai shang bang wa ai lam chye lu ai.Aten hpe gaw tup hkrak n chye lu tim manap daw hta re lam chye lu ai.Dai chyahkyi gaw kaning re na shang wa ai hpe kadai n chye dat ai raitim Chyahkyi hpe chyawm gaw gat shawng kaw gate galaw na chyawm nga ai leng masum la ni jawm adup sat na garan la kau sai lam chye lu ai.
Nam kaw na dusat ni mare kata shang wa ai gaw n kaja ai kumla re lam buga masha ni gaw tsun jahta nga ma ai. Hka hpyen, wan hpyen zawn re ai hpyen lama ma hkrum wa chye ai nga na mung tsun ma ai.Dai hte rau, jan chyat ai ngu ai gaw Du magam ni arawng aya hkrat wa ai kumla re lam Korea ni, Japan ni kaw na hkawt hkap la ma ai.
Hpungtang hpaji ningmu; Jan chyat mat ai gaw 6 minutes, 53 seconds na ai rai n na, shaning 100 ning hta kalang myi sha byin chye nga ai lam hpungtang hpaji ni hpe lakap let chye lu ai. Matut n na gaw 100 ning daram hta she kalang bai mu lu na re nga na mung tsun kajai nga ma ai re.
Ya aten hta Jinghpaw mung kata lawu ga de na myen hpyenla, hpyendu ni grai jashawn bang nga ai lam ni, chyahkyi shang ai lam ni, jan chyat ai lam ni a majaw buga masha ni gaw grai myit n zim taw ai lam chye lu ai.
Raitim, hpung sara langai gaw tsun ai. Anhte gaw buga madu ni re. Ndai ga, ndai ginra hta nga pra wa ai aten na sai. Karai Kasang lata da ai amyu re.Mat mat na amyu n re. Karai Kasang kaw manoi manat na nga ra ai nga tsun ai.
Re. Anhte gaw shalawt da hkrum sai amyu, hkye la da hkrum sai amyu n re ni?
