Lai wa sai (2002 , 2003) ning kawn Jinghpaw Wunpawng mungdan kata hta langai hte langai hkrum shaga hkat ai lam hta masan sa dik rai nga ai hte gunwa gunsa mung loi dik rai nga ai Miwa phone ni hpe wanglu wanglang lang lu shaga lu ai gaw daini 2009 ning du hkra matut manoi rai nga ai re.N dai Miwa phone ni a majaw bumring bumga hkan e shanu nga ai wunpawng myusha ni hte rai tim, rau nga ai zawn sha shaga hkat lu ai hte shaning law law ning wa n hkrum shaga hkat lu mat sai kanu kawa makyin jinghku ni hte bai hkrum shaga hkat lu ai gaw kabu hpa langai mung rai nga mali ai re.
Raitim; lai wa sai shaning kawn n dai Miwa phone ni hpe Jinghpaw Wunpawng Mungdan kata hta n mai shaga hkat na matu pat kau sana nga ai shiga ni brawng pru wa nga sai re. Madung gaw Maijayang kaw hpaw da ai hpaida dabang na manghkang a majaw byin pru wa ai manghkang langai mung rai nga ai re.
N dai Miwa phone ni hpe pat kau sana nga ai shiga ni gaw ya daini Myitkyina, Man Maw hte laga mare ni hkan e mung grau grau chyam bra wa nga sai hte daini pat kau sana, hpawtni pat kau sana nga ai shiga ni mung brawng nga sai hpe buga masha ni kawn na chye lu ga ai.
N dai shiga a majaw buga masha ni hta na Miwa phone lang nga ai ni gaw myit n pyaw shajang nga ma ai hpe mung matut chye lu ai. Myen phone hte shaga yang gaw manu jahpu mung grai law ai hte shaga ai n sen hpe mung atsawm sha n na lu ai majaw lama na Miwa phone pat kau yang gaw langai hte langai matut mahkai hkat ai lam hta gawng kya wa ai lam gaw law wa na re ngu ai buga masha wa a ningmu hte sha hpungdim dat ga ai.
Shiga shana ya ai ni yawng hpe chyeju dum ga ai.
