Gayin nga ai mungkan ndai hta masha hpan amyu myu,Htunghkring amyu myu nga ai. Ga hte htunghkring hta hkan nna bung ai ni hpe amyu langai ngu masat da ai. Dai amyu baw hpan law law hta na myi hpaw sai amyu, myi hpaw wa sai hte myi nhpaw ai ningsin kata na amyu ni nga nna garan nga ma ai. Grau nna gaw laika lu ai amyu ni hpe gaw mungkan hta myi man pa ai a myu ni nga nna amying shingteng jaw da ma ai.Anhte Wunpawng myu sha ni mung lai wa sai 1895 ning may shata 5 ya shani tup hta mungkan hta laika lu ai myu ruyan [481] hta jahpan shang masat da hkrum ai ni rai sa ga ai. Rev.Dr Ola Hanson hku nna 50 ning jan shakut shaja let asak pyi ap nawng kau ai du hkra Jinghpaw ni hpe mungkan de laika lu sai amyu langai hku nna shachyen ya dat sai rai. Mungkan hta laika lu ai my ni nga nna lata layung daw hti shalawm hkrum ai ni anhte Wunpawng sha ni rai sa ga ai. Myi man pa ai hte Karai Kasang a man hta mung chye chyang wa sai myu ni nga nna masat da hkrum sai re. Rai sa, anhte laika lu ai myu rai sa ga ai.
Dai ni na aten hta, anhte a ginra masa, mung masa ni a lapran anhte a ga anhte a laika hpe anhte Wunpawng sha ni gara hku jai lang tsun shaga nga ai hpe gaw anhte nmyit nmai nan ahkyet taw nga sai. Rung (Office) hkan Jinghpaw laika hpe tam shamat taw nga sai re. Jawng ( Education centre) hkan Jinghpaw laika ginlen ya ai lam n nga sai. Jinghpaw laika hpe atsawm chye ai Sara Kaba ni taw ma sai. Nawku hpung hkan maigan ga the nawku ai lam hpe grau sharawng nga ma sai. Wunpawng ni matu hkrit sang hpa rai sai.
Internet(online) hkan English hpe madung tawn let Wunpawng ramma ni matut mahkai hkat nga ma ai. Anhte Wunpawng ga ni gayau ma sai. Anhte ndai madang ndai lam hku sha naw hkawm nga ai rai yang shaning gade n na yang mat mat na hkyen nga sai. Roma laika kanu na Jinghpaw laika de shachawt ya ai Sara kaba Ola Hanson mung sumsing lamu na anhte Wunpawng sha ni hpe yu let grai yawn nga na sai. Shaning gade n na yang Jinghpaw laika the Wunpawng sha ni hpa pyi nseng ai madang de du mat sa re. Anhte laika , anhte a ga, anhte amyu hpe anhte ni nan sharawt let mungkan pinra ka-ang hta Wunpawng sha ni a awng padang dawnghkrawng hpe rau jawn sharawt saga. Anhte laika hpe anhte sharawt ga.
Matsing ; Ka lajang ai : Saulang
