A kyuhpyi garum na matu saw lajin dat ai laika

Mali hka madim hte Lamu ga hte seng nna, kyuhpyi garum na matu saw lajin dat ai laika
Nhtoi: November 7, 2010. Sunday

· Karai Kasang jaw da ai Jinghpaw Wunpawng myu sha ni a lamu ga, Nhprang sut rai, ja lungseng, hpun kawa tsit lali tsawm ai manu dan ai mungdan hpe hpan da ai hpe chye ju dum ga ai. Chyeju shakawn nga ga. Raitim ya dai ni gaw, chyasam wa a bawngring masing a majaw, dagam dala wa hkrum wa ai zawn anhte amyu ni hkam sha nga mali ai.

· Asia world hte China Power Investment (CPI) gaw nta htap (50) ram tsaw ai, Mali hka madim masing a majaw, Mung masha 10,000 mi jan gaw tinang a dum nta yi sun hkau na, lamu ga hpe kabai kau nna, laja lana rai shara htawt sit shangun ai lam hkrum nga ma ai.

· Yuzana company gaw Hugawng pa hta eka 200,000 lamu ga zing la ai majaw, yi sun hkauna htu sha ai jauman masha ni hkrap miprwi hte yawn madai nsen shapraw nga ma ai. Wunpawng Mungdan shara shagu ndai zawn manghkang byin nga sai.

· Mali hka madim project hte Yuzan company gaw, mung shawa nsen hpe n’gawn nsawn re ai, shingra tara, sut masa, mung masa, htunghkring masa ni hpe jahten kau nna, shingyim ahkaw ahkang tawt lai ai lam ni hta laja lana byin shangun nga ai. Tengman ai, jet ai, bawngring hte gaw sharawt masing re kun? Myit yu ra nga mali ai.

· Tinang lamu ga hpe makawp maga lu na matu gwi gwi nsen shapraw let Asuya tara rung de tara shang shawk shawn shakut nga ai mare buga jau man masha uhpung ni nga ma ai. Shanhte hpe ngang grin tsap lu na matu madi shadaw n-gun jaw nga ga. Lam amyu myu hku ladat shaw garum nga ga.

· 2010 ning November 7 ya gaw Myanmar Mungdan a ra lata poi re majaw, ndai nhtoi hta shawa kyu hpyi garum na matu kata ai rai nga ga ai. De a matu mung ja ja kyu hpyi nga ga.

· Mungkan shara shagu shanu nga ai, Jinghpaw Wunpawng ningbaw ningla ni, uhpunng uhpawng ni, makam masham hpung ni hte nu wa mungchying sha ni yawng Karai Kasang jaw da ai tinang a labau shang lamu ga ginra ni hpe ngang grin makawp maga lu na matu lahta na lam ni hte seng nna, ja ja akyu hpyi garum shakut sa wa ga law.

Kam hpa let saw shanga ndau shabra dat ga ai.
Shinra Makau grupyin makawp maga uhpung (15)