Denmark kaw du nga ai Jinghpaw Wunpawng Myusha ni gaw December 17,18,19 ya shani ni hta Christmas poi hpe Denmark Mungdan Ribe mare kaba hta masum ya tup galaw lai wa sai re.N'dai Denmark hta masum ya tup galaw lai sai Christmas poi hta Chyum laika sharin la ai lam , Christmas mungga hpe jawm hkam la ai lam, Christmas yungui ni hpe jawm sharin achyin la ai lam hte Christmas kumhpa ni hpe shagrau hkam la ai lam ni hpe galaw lai wa sai re.
December 17 ya shani hta gaw Saranum Marip Ja Ing (Kale Kai Ja) kaw na sharin achyin ya ai Jinghpaw Christmas "choir" hpe sharin hkam la sai hte December 18 ya shani hta mung Saranum Marip Ja Ing (Kale Kai Ja) kaw na sha, shani tup Karai Kasang a sung htum ai chyum laika hpe sharin ya lai wa sai re.
Saranum Marip Ja Ing gaw Nawng Nang Chyum College hta Manga (5) ning sharin awng dang la ai hpang ( Bth ) Janmau hpe gup la n'na, Jinghpaw Mungdan na buga hpung lahkawng hta 10 ning jan Karai Kasang a matu magam gun apnawng lai wa sai hpang ya daini Denmark Mungdan hta Chyum hpaji matut sharin hkam la na matu hkyen lajang nga ai re.
December 19 ya shani hta gaw "Simsa lam a Karai Shangai Chying hkai wa sai" ngu ai ga baw hte Saranum Maran Seng Zin kaw na (English,Myen,Jinghpaw) ga ni hte Mungga htawn tsun dan lai wa sai re. Saranum Maran Seng Zin gaw Kuthkai Chyum Jawng na sharin saranum rai nga ai hte ya daini Norway Mungdan hta Chyum hpaji hpe matut sharin hkam la nga ai Saranum langai rai nga ai re.
N'dai Denmark Jinghpaw Wunpawng Christmas poi hta sa du shang lawm ai Myusha yawng gaw 30 jan rai n'na, poi hta du sa ai laga maigan myusha ni yawng hte rai yang numroi 120 jan shang lawm let a'ngui a'pyaw galaw la lu sai re.
Saranum Maran Seng Zin
Saranum Marip Ja Ing ( Kale Kai Ja )
N'hkum Ah San kaw na solo hte mahkawn shakawn nga yang
Ramma ni Karai Kasang hpe Jinghpaw N'sen hte mahkawn shakawn
Kumhpa Shagrau Hkam la nga ai shadang Ja Li
Christmas malu masha hte mung n'dai zawn