Jinghpaw Wunpawng Buga shara shagu hta nga nga ai Ramma ni gaw lai wa sai Dercember shata praw 10 ya daram kaw na "Christmas Carols Singing" hkan mahkawn na matu shaman shakyang nga ma ai lam na chye lu ga ai.Ya na zawn rai ramma ni shaman shakyang nga ma ai hta, december 25 ya shana e hkrang shala madun dan na matu hta ahkyak dit rai nga ai "Madu Yesu" shangai wa ai lam ni hpe mung madung dat let shaman shakyang nga ma ai lam na chye lu ga ai.
Ramma langai myi KMG de tsun dan wa ai gaw; Ya na zawn rai manaw manang ni law law hte hkrum zup let christmas yungui hte gamung naura ni hpe shaman shakyang lu ai gaw ramma ni a prat hta manu dan kaja ai lam rai nga ai hte myit kraw salum hta mung tsun n'dang hkra kabu hkamsha lu nga ai lam tsun dan wa sai re.
Shi matut tsun dan wa ai hta ; Mayak mahkak law law a majaw Christmas ngu ai Madu Yesu a kabu gara shangai n'htoi hta shang lawm lu na lam n'nga ai manaw manang ni a matu mung grai myit n'pyaw hkam sha ai lam tsun dan wa sai re.
