Hollywood shingni shayi "Actress" Michelle Yeoh gaw mani November shata praw 6 ya shani Myen mung a Democracy ningbaw Aung San Suu Kyi hte sa du hkrum shaga lai wa sai re.Ya na zawn Michelle Yeoh Aung San Suu Kyi hte sa du hkrum shaga ai lam madung gaw, ya shi gayet nga ai Sumla hkrung langai a majaw re lam na chye lu ga ai.Hollywood kaw na shapraw na rai nga ai Director Luc Besson a “Divided Heart” ngu ai Sumla hkrung gaw Myen mung a mung masa lam hte seng ai sumla hkrung rai n'na, Aung San Suu Kyi hte NLD hpe madung tawn let gayet lajang nga ai sumla hkrung rai nga ai re.
N dai sumla hkrung hta madung hkrang shala nga ai, Hollywood hte Hongkong shingni shayi "Michelle Yeoh" gaw Aung San Suu Kyi a shara hta shang n'na hkrung shapraw/shala ra nga ai majaw Aung San Suu Kyi a lam/labau ni hpe grau na chye lu na matu ya na zawn Myen mung de du sa let Aung San Suu Kyi hte NLD parti hpe hkrum shaga ai re lam na chye lu ga ai.
Malaysia kaw shangai kaba wa ai Hollywood hte Hongkong shingni shayi Actress "Michelle Yeoh" gaw lai wa sai ten ni hta mungkan e mying kaba lai wa sai "Tomorrow Never Dies" ngu ai James bond sumla hkrung, Crouching Tiger, Hidden Dragon hte laga mying kaba ai sumla hkrung ni hta mung hkrang shala lai wa sai re.
Ya gayet nga ai "Michelle Yeoh" a “Divided Heart” ngu ai Sumla hkrung hta Myen mung a labau hpe tsawmra hkum hkra bang gayet nga ai lam na chye lu ga.
