Myen gumshen asuya hpyenla ni hte balik hpung ni gaw jinghpaw wunpawng mungdan kata hta hkawmwa hkawmsa nga ai bu hkawm masha ni hpe shawoi na hta grau na laja lana jep nga ma ai lam shiga na lu ai. Wanleng, Sanghpaw hte hkawmsa nga ai ni hpe jep jeng nga ai zawn Mawdaw hte hkawmsa nga ai ni hpe mung shara shagu jahkring jep nga ma ai lam Myitkyina hte Manmaw shiga lawk ni hpe lakap let chye lu ai.Bu hkawm masha ni hpe madung jep nga ai hta gara de hkawmsa na , hpa majaw hkawmsa ai, hpa baw gun shalai hkawm ai ta? ngu ai ga san ni hte jep nga ma ai lam na chye lu ga ai. Ya na zawn hkrun lam n tsa hta laja lana jep jeng nga ma ai hte mare buga kata hkan e mung aten ntam shaga jahkring jep nga ma ai majaw hkawmwa hkawmsa grai yak hkak nga ai lam matut chye lu ai.
N dai zawn jep jeng ai lam ni gaw Kokang hte myen ni gaphkat hpang dat ai kaw na lahta myen mung daw ni hta ya na zawn grau sawng wa ai re lam hte KIO/A hte Myen Gumshen Asuya a bawng ban jahkrum nga ai lam mung daini du hkra ahpraw achyang re hpe atsawm sha n'chye lu shi ai a majaw mung malawng rai nga ai lam buga masha ni kawn na chye lu ga ai.
