Myen gumshen hpyen asuaya gaw shanglawt kyit hkai rung ni yawng hpe dawm kau na matu lai wa sai bat hta Jinghpaw Wunpawng Mungdan shanglawt hpung de shana wa sai re, n'dai dawm kau na rung ni gaw Jinghpaw mung hta na ni sha n'rai ai sha Sam mung hta galaw da ai rung ni yawng mung lawm ai lam na chye lu ai.Tinang Kanu shanglawt asuya KIO kaw na mung Myitkyina hta nga ai kyit hkai rung hta lai na laga kyit hkai rung ni hpe gaw November 25 ya hpang n'hkrat ai sha dawm kau sana re lam seng ang ai kyit hkai rung lit hkam ni hpang de shana dat sai re.
Lai mat wa sai ten shanglawt hte myen gap hkat jahkring dat ai 1994 ning kaw na, kyit hkai rung ni hpe gaw gap mat wa ai gaw daini du hkra nga yang yawng rung 22 tup rai nga ai re, ya gaw asak 16 ning hpring nga sai n'dai myen hte shanglawt a lapran na shanglawt kyit hkai rung ni yawng hpe dawm kau shangun sai majaw shada da langai hte langai matut mahkai ai lam mung htum mat sai ngu ai lachyum mung rai nga ai re.
Ya ten hta Jinghpaw Wunpawng myusha ni yawng mung majan bat bai manam sai shanglawt hte myen gaw majan bai byin na n'na na sai nga na myit sawn,tsun shajang nga ma ai lam na chye lu ga ai.
